ສະພາການຄ້າແລະອຸດສາຫະກຳ ນະຄອນຫຼວງວຽງຈັນ ເຂົ້າຮ່ວມພິທີເຊັນສັນຍາຮ່ວມກັນ ກ່ຽວກັບການຮ່ວມມືແລກປ່ຽນບົດຮຽນ ເພື່ອຊອກຫາຊ່ອງທາງໃນການຮ່ວມມືດ້ານການຄ້າ ແລະ ການລົງທຶນໃນລາວ ລະຫວ່າງ ສະພາການຄ້າ ແລະ ອຸດສາຫະກໍາແຫ່ງຊາດລາວ ກັບ ສະຫະພັນອຸດສາຫະກໍາ ແລະ ການຄ້າທົ່ວປະເທດຈີນ ໃນວັນທີ 27 ພຶດສະພາ 2019 ທີ່ສະພາການຄ້າ ແລະ ອຸດສາຫະກໍາແຫ່ງຊາດລາວ ຕາງໜ້າຝ່າຍລາວໂດຍ ທ່ານ ອຸເດດ ສຸວັນນະວົງ ປະທານສະພາການຄ້າ ແລະ ອຸດສາຫະກໍາແຫ່ງຊາດລາວ, ຕາງໜ້າ ສປ ຈີນ ທ່ານ Xu Lijiang ຮອງປະທານສະຫະພັນ ອຸດສາຫະກໍາ ແລະ ການຄ້າ ທົ່ວປະເທດຈີນ. ນອກຈາກນີ້, ກໍມີຕົວແທນບັນດາຫົວໜ່ວຍທຸລະກິດຫຼາຍຂະແໜງການຈາກສອງປະເທດເຂົ້າຮ່ວມ.
ສໍາລັບການເຊັນບົດບັນທຶກ ຄວາມເຂົ້າໃຈຄັ້ງນີ້ ເປັນນິມິດໝາຍອັນໃໝ່ທີ່ຈະເຮັດໃຫ້ການຄ້າຂອງລາວມີບາດກ້າວໃໝ່ ໂດຍສະເພາະກໍແມ່ນພາກທຸລະກິດ, ບໍລິສັດເອກະຊົນຕ່າງໆ ເຊິ່ງມັນເປັນການເປີດໂອກາດໃຫ້ນັກທຸລະກິດຂອງສອງປະເທດໄດ້ແລກປ່ຽນຂໍ້ມູນ – ຂ່າວສານທາງດ້ານການຄ້າ – ການລົງທຶນຮ່ວມກັນຂອງທັງສອງປະເທດ. ນອກຈາກນີ້, ເພື່ອໃຫ້ການຈັດຕັ້ງປະຕິບັດບົດບັນທຶກຄວາມເຂົ້າໃຈດັ່ງກ່າວດໍາເນີນໄປຢ່າງສະດວກ ກໍຈະມີການຈັດຕັ້ງຄະນະກໍາມະການເຮັດວຽກຮ່ວມກັບ ສປ ຈີນ ເພື່ອໃຫ້ໄດ້ຮັບໝາກຜົນອັນສູງສຸດ.
